Baramati Lok Sabha 2024 Election : ‘माझ्या विचारांचा खासदारच निवडून आला पाहिजे. लोकसभेला मिठाचा खडा लागला, तर विधानसभेत वेगळा निर्णय घेईल’, असे अजित पवार बारामतीत म्हणाले. 4 फेब्रुवारी रोजी अजित पवारांनी दोन कार्यक्रमात थेट सुप्रिया सुळे आणि शरद पवारांविरुद्ध दंड थोपटले. त्यामुळे अजित पवारांचा उमेदवार कोण असेल, याबद्दल चर्चा सुरू झाली आहे. सुनेत्रा पवार किंवा पार्थ पवार यांचं नाव यात नाही. तो नेता कोण आणि त्याची इतकी चर्चा का होतेय?
ADVERTISEMENT
अजित पवार काय म्हणाले ते आधी वाचा…
बारामती लोकसभा मतदारसंघात अजित पवारांचे कार्यक्रम झाले. ‘लोकसभा व विधानसभा या दोन्ही वेळेला मला तुमची साथ लागेल.”
“आपल्या विचारांचा खासदार झाला तर मोदी, शाहांकडून मी हवी तेवढी विकासाची कामे मंजूर करून आणू शकतो. त्यासाठी माझ्याच विचारांचा खासदार असणे आवश्यक आहे. मला खासदारकीला मिठाचा खडा लागला तर आमदारकीला मी वेगळा विचार करेन, त्यावेळी कुणाच्या बापाचे ऐकणार नाही’, असा इशारा अजित पवारांनी दिला.
हेही वाचा >> ‘कुणाच्या बापाचं ऐकणार नाही’, अजित पवारांचा बारामतीकरांना इशारा
पुढे ते असेही म्हणाले की, “लवकरच मी महायुतीचा उमेदवार जाहीर करणार आहे. मी उमेदवार आहे, असे म्हणून मतदान करा. शेवटची निवडणूक आहे, असे सांगून भावनिक आवाहन केलं जाईल. कधी शेवटची असणार आहे काय माहिती?”, असंही ते म्हणाले.
सुप्रिया सुळेंच्या पराभवासाठी अजित पवार लावणार ताकद?
अजित पवार बारामतीतील मतदारांसमोर जे बोलले त्यातून एक गोष्ट स्पष्ट झाली की, अजित पवारांनी बारामती लोकसभा मतदारसंघात स्वतःचा खासदार निवडून आणण्याचे फार मनावर घेतले आहे. माझ्या विचारांचा खासदार हवा आहे, त्यावरून अजित पवार कुठल्यातरी जवळच्या व्यक्तीला उमेदवारी देणार हेही स्पष्ट झाले आहे. पण, ती व्यक्ती कोण असेल?
सुनेत्रा पवार… पार्थ पवार की…
बारामती लोकसभा मतदारसंघातून अजित पवार हे पत्नी सुनेत्रा पवारांना उमेदवारी देतील, असे म्हटले जात आहे. त्याचबरोबर पार्थ पवारांचेही नावही अधूनमधून चर्चिले जाते. पण, स्थानिक राजकारणात ज्या नावाची चर्चा आहे, ते नाव आहे आमदार दत्तात्रय भरणे.
दत्तात्रय भरणे हे इंदापूरचे आमदार आहेत, पण आता भाजप शिवसेना आणि राष्ट्रवादीचा अजित पवार गट एकत्र आल्याने वेगळी समीकरणं निर्माण झाली आहेत. अजित पवार यांनी शिरुर लोकसभा मतदारसंघात अमोल कोल्हेंचा पराभव करण्याचा चंग बांधला आहे. त्याचबरोबर मावळ लोकसभा मतदारसंघावरही अजित पवारांनी लक्ष्य घातलं आहे.
सुप्रिया सुळे यांच्याविरोधात पवार कुटुंबातीलच व्यक्ती नको म्हणून दत्तात्रय भरणे यांचे नाव आघाडीवर आहे. या चर्चेला हवा दिली ती दत्तात्रय भरणे यांनी केलेल्या एका विधानाने.
सुनेत्रा पवार नाही, तर ‘हा’ उमेदवार?
इंदापूर तालुक्यातील लाकडी येथे 30 डिसेंबर 2023 रोजी भरणे यांचा कार्यक्रम होता. या कार्यक्रमात भरणे यांचे भाषण सुरू होते. त्याचवेळी एकजण म्हणाला, ‘मामा तुम्ही खासदार व्हा.’
हे ऐकून आमदार दत्तात्रय भरणे हे जे बोलले, ते खूपच सूचक होते. ते म्हणाले होते, “माझे व उपमुख्यमंत्री अजित पवार यांचे ठरले आहे. हे मी जाहीर न सांगता एकांतात व योग्य वेळ आल्यावर मीही सांगेन व तुम्हालाही समजेल.”
हेही वाचा >> 38 विरुद्ध 62… प्रशांत किशोरांनी सांगितला भाजपला हरवण्याच्या फॉर्म्युला
या विधानाचे राजकीय अर्थ लावले जात असताना दत्तात्रय भरणे यांनी यावर पडदा टाकण्यासाठी ‘आपण कदापिही बारामती लोकसभेची निवडणूक लढविणार नाही. मी सध्या जिथे आहे तिथे सुखी आहे’, असं सांगितलं. पण, भरणे यांचे नाव बारामती लोकसभा मतदारसंघातील उमेदवार म्हणून स्पर्धेत आहे. दत्तात्रय भरणे अजित पवारांच्या जवळचे असून, इंदापूरमधून निवडून आणण्यासाठी अजित पवारांनी प्रयत्न केले होते.
ADVERTISEMENT