Ajit Pawar Jacket: अजितदादांचा पॅटर्नच वेगळा, आता गुलाबी जॅकेट नाही तर थेट...

गुलाबी नाही तर पैठणी जॅकेट.. अजितदादांचा पॅटर्नच बदलला!

अजित पवार हे गुलाबी जॅकेटमुळे सध्या चर्चेत आहेत. असं असताना आज अचानक ते पैठणी जॅकेट परिधान केलेले दिसून आले. त्यामुळे आता त्यांच्या या जॅकेटची देखील सध्या जोरदार चर्चा सुरू झाली आहे.

हे ही वाचा>> Ajit Pawar : "...म्हणून मी गुलाबी जॅकेट घालायला लागलो", अजित पवारांनी सांगितलं कारण

त्याचं झालं असं की, अजित पवार जन सन्मान यात्रेच्या निमित्ताने अजित पवार हे आज नाशिक जिल्ह्यातील येवला येथे पोहचले. जिथे त्यांनी नागरिकांसोबत संवाद साधला. याचवेळी येवल्यातील प्रसिद्ध असलेल्या पैठणीपासून तयार करण्यात आलेला खास जॅकेट हे अजितदादांना भेट देण्यात आलं. त्यामुळे त्या जॅकेटचा मान ठेवत अजितदादांनी त्यांचं गुलाबी जॅकेट बाजूला ठेवून पैठणी जॅकेट अंगावर चढवलं. याचवेळी अजित पवारांना पैठणीचाच खास फेटाही बांधण्यात आला होता. 

महिला मतदारांना आकर्षित करण्यात प्रयत्न 

लोकसभा निवडणुकीतील पडझडीनंतर अजित पवार आणि त्यांचा राष्ट्रवादी काँग्रेस पक्ष हा आपली स्वत:ची एक व्होट बँक तयार करण्यासाठी प्रयत्नशील दिसत आहे. अंतरिम अर्थसंकल्पात अजित पवार यांनी 'माझी लाडकी बहीण' या योजनेची घोषणा करून महिला व्होट बँक आपल्या बाजून कशी झुकेल यासाठी प्रयत्न सुरू केले. 

त्यानंतर काही दिवसातच एक विशेष कॅम्पेन अजित पवारांच्या पक्षाच्या वतीने तयार करण्यात आलं. ज्यामध्ये गुलाबी रंगाचा वापर प्रामुख्याने केलेला दिसून येत आहे. ज्यामध्ये अजित पवारांचं सोशल हँडल, त्यांच्या पक्षाचं सोशल हँडल, बॅनर यामध्ये गुलाबी रंगाचा वापर करण्यात आला. एवढंच नव्हे तर चक्क अजित पवार यांनीही गुलाबी जॅकेट घालण्यास सुरुवात केली.

हे ही वाचा>> माढ्यात मोहितेंनंतर पवारांचा दुसरा डाव! अजितदादांना धक्का, शिंदेंना घरातूनच चॅलेंज?

याच सगळ्यातून अजित पवार हे आता महिला मतदारांची एक व्होट बँक तयार करण्याचा प्रयत्न करत आहेत. कालपासून (8 ऑगस्ट) त्यांची जनसन्मान यात्रा देखील सुरू झाली आहे. ज्यामध्ये ते प्रामुख्याने ग्रामीण भागातील महिलांशी सातत्याने संवाद साधताना दिसत आहेत. 

आता याच सगळ्या कॅम्पेनचा विधानसभा निवडणुकीत नेमका काय परिणाम होणार हे पाहणं महत्त्वाचं ठरणार आहे. पण मागील काही दिवसांपासून अजित पवारांनी गुलाबी जॅकेट घालून जो एक पॅटर्न सेट केला होता तो मात्र आज त्यांनी येवल्यात बदलला!

गुलाबी जॅकेट अन् अजित पवारांना महिलेने विचारला 'तो' प्रश्न

दरम्यान, काही दिवसांपूर्वीच एका महिलेने अजित पवारांना त्यांच्या गुलाबी जॅकेटवरून एक प्रश्न विचारला होता. "दादा, मागच्या एक महिन्यापासून तुम्ही पिंक कलरच्या जॅकेटमध्ये आम्हाला सर्वत्र दिसत आहात. असं का आणि पिंक कलर तुमचा आवडता कलर आहे का?"

'...म्हणून मी गुलाबी जॅकेट घालतो'

जेव्हा उपस्थित महिलांपैकी एका महिलेने अजित पवारांना हा प्रश्न विचारला तेव्हा त्यावर अजितदादांनी देखील गंमतीशीर उत्तर दिलं होतं, "आपण पण वेगवेगळ्या साड्या नेसता, वेगवेगळे कपडे घालता. एखादी गोष्ट तुमच्या जवळच्या सगळ्यांनी ना, ही साडी तुम्हाला जास्त खुलून दिसते. तर तुम्ही सारखी सारखी तीच साडी घालता." 

"तसं मला अनेकांनी, माझ्या सहकाऱ्यांनी सांगितलं की, हे जॅकेट जरा चांगलं दिसतं म्हणून मी घालायला लागलो", असं खुसखुशीत उत्तर अजित पवारांनी दिलेलं.