Milind Deora : शिंदेंनी काँग्रेसला पाडले खिंडार! देवरा आज करणार सेनेत प्रवेश

मिलिंद देवरा हे दक्षिण मुंबई लोकसभा मतदारसंघाचे माजी खासदार राहिलेले आहेत. लोकसभा निवडणुकीच्या अनुषंगाने जागावाटपाचा मुद्दा चर्चेत आल्यानंतर देवरा यांनी आपली भूमिका मांडण्यास सुरूवात केली होती. महाविकास आघाडीमध्ये काँग्रेस, उद्धव ठाकरे यांची शिवसेना आणि शरद पवार यांची राष्ट्रवादी काँग्रेस आहे. हा मतदारसंघ २०१४ पासून शिवसेनेकडे आहे. त्यामुळे शिवसेनेच्या ठाकरे गटाने दावा केला. देवरा यांनी याला विरोध केला. मात्र, तेव्हापासून देवरा हे काँग्रेसला सोडचिठ्ठी देणार, ही चर्चा सुरू झाली होती.

काँग्रेसचा राजीनामा, शिवसेनेत प्रवेश

काँग्रेसच्या सर्व पदांसह पक्ष सदस्यत्वाचा राजीनामा दिला असल्याची माहिती मिलिंद देवरा यांनी ट्विट करून दिली आहे. ‘माझ्या राजकीय प्रवासातील एक महत्त्वाचा अध्याय संपत आहे. मी काँग्रेस पक्षाच्या सदस्यत्वाचा राजीनामा दिला आहे. काँग्रेससोबत माझ्या कुटुंबाचं ५५ वर्षांपासूनचं नातं संपलं आहे. अनेक वर्षांपासून त्यांच्या पाठिंब्यासाठी मी सर्व नेते, सहकारी आणि कार्यकर्त्यांचे आभार मानतो, असे देवरा यांनी पोस्टमध्ये म्हटलं आहे.

हेही वाचा >> कोण आहेत हे 4 शंकराचार्य? राम मंदिरावेळीच त्यांची का होतेय चर्चा?

हेही वाचा >> ‘मी तेव्हा चूक केली… बापाची जहागिरी वाटते..’, कल्याणमध्ये ठाकरेंची श्रीकांत शिंदेंवर टीकेची झोड

मिलिंद देवरा यांनी काँग्रेसचा राजीनामा दिल्यानंतर त्यांच्या पक्षांतरांच्या वृत्तावर शिक्कामोर्तब झाले. शिवसेनेत प्रवेश करण्यासंदर्भातील देवरा यांचा कार्यक्रमही समोर आला आहे. मिलिंद देवरा सिद्धीविनायक गणपतीचे दर्शन घेणार आहे. त्यानंतर दुपारी दीड वाजता ते वर्षा बंगल्यावर जाणार आहेत. दोन वाजता मुख्यमंत्री तथा शिवसेना मुख्य नेता एकनाथ शिंदे यांच्या उपस्थित प्रवेश करणार आहेत.